المشاركات

حاب اشاركم تجربتي مع ال VW ID.4 
ونزلتي فيها ع العقبة.

الاحد نزلت ع القروب انه بدي انزل ع العقبة يوم الاثنين بالليل عشان اخد نصائح ع نقاط الشحن للامانه الموضوع غلبني شوي لو انزل هسا بكون اسهل ف عشان الكل يستفيد.

بالبداية شكراً لكل الناس الي جوابتني المرة الماضية وخصوصاً الي نصحوني ادير بالي بسبب الجو.

قبل ما احرك من عمان رنيت ع الدويات الخارجية لاتاكد من سلامة الطرق وخبرني انه الامور تمام و تحركت ع ٦ وشوي المسا.

الانطلاق كان من #الياسمين والشحن 95% و الرينج عندي كان اقل من 370 وللامانة نارلين وايدنا ع علقبنا 

اول اشي رح احكي عن ظروف الجو 

الجو زي ما بتعرفوا كان كثير برد وهذا الاشي كثير باثر ع شحن السيارة غير انه طول الطريق مشغلين دفاية القزاز الامامي عشان الضباب والحرارة باغلب الطريق كانت 4 درجات .

بس الحمد لله الطريق كان جداً سالك وفش حد عليه فاضي وما في مطر، بس شوية زوابع قعدت اقل من ربع ساعة 

ع الطريق كنت مثبت السرعة بحدود 100 وضليت ماشي لحد معان وهناك كان معنا شحن 26% كنا مش عارفين اذا رح يكفو او لا بس حكينا بنشحن شوي احتياط شحنا 10% قعدنا فيهم بحدود ساعة ونص،  وقفت عند قهوة طيبة عنده اكثر من نقطة شحن 32.

حركنا وكان ضايل ل العقبة 118 كيلو تقريبًا وصلنا هناك معنا شحن 14% وهون كنت كاشي بحدود ال80 احتياط .

يعني مجمل السحب ع الطريق 91% مع دفاية زجاج و حرارة 4 درجات واتوقع عجو الاردن ما في ظروف اصعب من هيك بكثير.

الرجعة شحنا فل 100 وحركنا 11 بالليل

الحرارة كانت بروضوا 4 درجات بس..

وصلنا معان ع القهوة وطبعا عقبة ل معان كله طلوع 118 كليو تقريباً، وكان الشحن 64% المية، طول الطول كنت مثبت السرعة ع 70-80. طبعا اول ما صلنا كان رينج السيارة معطني انه بتكفي بس حكينا بنرتاح ساعة وبنشحن شحنا 8% .

بعدها كان ضايل ل عمان بحدود 220 كليو كانه، المهم اول الطريق كان مهدي ماشي 80 بعدين شفت الامور طيبة مستحيل انقطع، ف اخر 150-170 كليو كنت ماشي فوق ال 130 واحيانا اكثر.. و اخر 100 كليو شغلت دفاية زجاج.

وصلت عمان اظن 17% مش متاكد كثير صراحة بس كان فيها. يعني حتى الرجعة تقريبا صرفت 91% بس كنت كثير اسرع من الروحة والكل بعرف قديه السرعة العالية بتفرق ع الشحن.

السيارة ف هاي الظروف الصعبة شحنة وحدة بتكفي فيها وهذا اشي ممتاز جداً جداً ولو كان هذا المشوار بالصيف كان فرق كثير كثير.

بالنسبة للسيارة ع الطريق، ما شاء الله عنها، ما بتحس باي تعب او ارهاق، مثبت سرعة طول الطريق وراحة ممتازة. وصراحة اهم اهم اشي كان، الكشافات، الكل بعرف السواقة بالليل مزعجة ومتعبة عشان الانارة، مع كشافات السيارة بتكون مضوف الصحراء كلها و الضو بلف معك ع الكوربات وهذا اشي كثير بفرق وبريح..

السلبية الاساسية الي غلبتني للامانة، هو شحن السيارة بالعقبة، وخصوصا لوضعي كنت نازل صد رد السيارة بطاريتها كبيرة 84 كليو، وبدها ع شاحن ال 32 فوق ال12 ساعة، 

دورت وسالت عن نقاط شحن 32 ما لقيت كان بس في بكم فندق 5 نجوم.. المهم شحنت بالفندق الي نزلت فيه ع سرعة 20 امبير طول 9 ساعات بس ما كفو، سالت بالاخر ودلوني ع البستنجي لتاجير السيارة " وهو الي شريت منه السيارة بالحرة، جماعة مرتبين للامانة" 

المهم عندهم يمكن عندهم 5 نقاط شحن شحنت عندهم ع سرعة 24 لانه ع 32 كان القاطع ينزل للاسف. والشباب للامانة ما قصرت ابداً ابداً.

المهم ملخص التجربة جداً ممتازة وهسا لو بدي انزل كمان مرة ما رح اتغلب ابداً ابداً وحبيت اشارك التجربة لغيري يستفيد.

مشكلتنا كلنا رح تنحل ونبطل نسال ب سيارات الكهرباء، لما يتم توفير تقاط شحن سريعة لكافة السيارات بكل المملكة وما أتوقع هذا الاشي ياخد كثير وقت وقريبا رح نبلش نشوفه.